Vará juogadit

Orru nu ahte ferte leat náitalan oalle jorba nisson gii ii liiko johttit eará riikaide jus fal áigu vará juogadit.

Galgen vará addit otne, muhto dat ii meidnestuvvan go dál lean singel. Sis leat moadde gažaldaga maid ferte vuos vásttidit. Ja láven gal leat oalle mihá rehálaš. Nu ahte gažáldahki jus fal lean anášan ođđa (ođđa ja ođđa) bárdniin dan golmma máŋemus mánuid, de vástidin ahte nu lean. Danin in beassan vará addit.

Golmma mánnui ii galgga juogadan seaŋgga ođđa olbmuin jus galgá vará addit. Ja in mun gal dieđe, muhto go olbmos ii leat irgi de han sáhttá ribahit liikostit muhttin bárdnai. Vaiko geavaha ge gummi de eai suova vará addit.

Mun gal dieđusge jerren manin nu lea, muhto albma vástádusa gal in ožžon. Dieđán juo ovdalažžas ahte sii isket buot vará juohke háve várálaš buozalmasvuođain nu go HIVas. Nu ahte ii sáhte leat ballu ahte ožžot dakkár vará ge. vuoi?
Šadden suinna dadját ahte jus mun in sáhte lohppidit ahte mun in gávnna ođđa irggi dehe ođđa "olbma", lea go de ávki boahtit nuppes ge.
Son duššo moddjesti ja jearai ean go bija ođđa áiggi munnje.

Oaidnit de geassemánus jus dalle oažžun vará addit.

Okta olmmai mus, son gal imášti manin jur dakkár gažáldagat oba jerret ge. Go oaivvilda ahte vel olbmot geain lea duššo dat okta olmmai ii sáhte lohppidit ahte dat ii leat fitnan gean ge eará seaŋggas. Ja ihan duohta han dat lea. Dan áiggun nuppes jearrat! Sammat de jurdili ahte ii hal duot leat vearrát go ovttasge earás valdit vará. Go dan lohppidit gos nubbi olmmoš lea leamaš dan gal ii sáhte oktage, eará dakkár gii ii goassege anáš. Ja son gal dieđusge ii dárbbaš jurddašit ge gos dat "olmmai" lea ovdal fitnan....

Duššo go álgen hupmát dan birra, de gullen maid ahte dan jagi rajes eai oažžo homo't addit vará. Manin nu lea, dat ii ge čilgejuvvo beare bures.

Seammas go eai fuola vará dearvvaš olbmuin, geat duos dás fitnet eará riikain, geat duos dáš anášit, dievdduin geat liikojit eará dievdduide ja seakka olbmuin, lea go de imáš ahte eai oažžo nohkka vará olbmuin?

Na mun goit imáštan. Ja jurddašaddan jus lea oba veara ge nuppes mannát doppe.
Na jus dan radjái in leat fuobman ahte in hálit šat goassege sex'a, in hálit šat goassege fitnát dobbelis go Danmárkkus ja ovdal go lean juo oalle jorba áhkoš.